Pas dorëheqjes së Arben Carës, Ervis Gjoshi komandohet drejtor i Përgjithshëm i Zjarrëfikësve.
Ministri i Punëve të Brendshme, Besfort Lamallari, ka prezantuar këtë të hënë drejtorin e ri të komanduar të Drejtorisë së Përgjithshme të Mbrojtjes nga Zjarri dhe Shpëtimit, Ervis Gjoshi.
Gjoshi merr drejtimin e institucionit pas dorëheqjes së Arben Carës. Ai ka një karrierë 18-vjeçare në Policinë e Shtetit, ndërsa më herët ka mbajtur detyrën e zëvendësdrejtorit për Rendin dhe Sigurinë në DVP Tiranë, si dhe atë të shefit të Komisariatit në Dibër.
Gjatë prezantimit, ministri Lamallari vlerësoi eksperiencën e Gjoshi dhe theksoi rëndësinë e forcimit të strukturave të MZSH-së.
“Me një karrierë prej 18 vitesh në Policinë e Shtetit, me përvojë të gjatë në drejtimin e strukturave të sigurisë, ai sjell në këtë detyrë eksperiencën dhe përgjegjshmërinë e nevojshme për një strukturë kaq të rëndësishme”, u shpreh Lamallari.
Sipas ministrit, ndër prioritetet e drejtimit të ri do të jetë rishikimi i kuadrit ligjor për MZSH-në, si dhe hartimi i një programi kombëtar për parandalimin e zjarreve.
Lamallari theksoi gjithashtu se qytetarët duhet të kenë një shërbim profesional, të organizuar dhe të gatshëm për t’u përballur me emergjencat në çdo kohë.
